ඉතින් අවසරයි....

සිව් වසකට මදක් වැඩි කල් 

බලා සිටියත් මදි තවම මට 

නුඹේ රුව ගුණ වයනු කෙලෙසක  

මගේ ආදර සබරගමු අම්මා

ආදර කඳු සිප හමනා සුලඟට 

බෙලිහුල් ඔය නම් කෙහෙරැළි රඟදෙන 

නුඹ මුව මඩලේ රුව කොතරම් කල් 

බලා හිටියත් මදි තවම මට

හැර යන්නට වන නුදුරු හෙට දින 

රැගෙන යමි මම සියළු ගුණ දම් 

සමනල වැවතරම් ගැඹුරු හද මඩලින් 

කාන්දු කරන ලද අපේ හදවත් වෙත

විප්ලවය II

 විප්ලවය I කොටස

13වන වතාවටත් මම ලියමින් සිටි නවතම කෙටිකථාව කියවා බැලූවෙමි. මෙම කථාව කෙසේ අවසන් කරන්නද යන්න දින ගනනාවක් සිටම මගේ සිතට වද දෙමින් පැවතිනි. කෙටිකථාව විකාශනයේදී මා මැවූ චරිතයන් විකාශය වූ අයුරු පිලිබද නැවත නැවතත් කල්පනා කලෙමි. උග‍්‍ර විප්ලවවාදී උගත් කම්කරු නායකයෙකු ලෙස ගොඩ නැගූ ප‍්‍රධාන භුමිකාව අවසානයේදී දෙතැනක් අතර දෝලනය වන්නට වීම සැබැවින්ම මටද මානසික වදයක් විය. සැබැවින්ම මේ කතාන්තරය ලිවීම තුලින් ධනවාදී සමාජ ක‍්‍රමය තුල තමන්ට විදීමට සිදුවන ගැහැට වලට එරෙහිව සටන් කරන වීර චරිතයන් පිළිබඳව විවරණයක් කරන්නට බලාපොරොත්තු වුනෙමි. එවැනි විප්ලවීය වෙනසක් මා ජීවත් වෙන සමාජය තුල පවා සිදුවිය යුතුයැයි මා තුල වූ කල්පනාව මේ සදහා මා මෙහෙය වීය. නමුත් අවසනදී සිදුවූයේ කුමක්ද? බලාපොරොත්තූ වූ පරිදිම අභීතව සටන් කල ඒ වීර කම්කරුවන්ට ජයග‍්‍රහනයේ කිරුළු පලඳවමින් කථාව අවසන් කරන්නට මට නොහැකිය. තම සිතින් විඳවමින් දෙකොන ගිනිගත් පුද්ගලයෙකු, අනාගතය ගැන නිශ්චිත ප‍්‍රතිපත්තියක් නොමැති පුද්ගලයෙකු ඒ සමාජයේ රජ කරවා විප්ලවය අවුලෙන් අවුලට යනු දකින්නට යම් රචකයෙකු කැමති වනු ඇද්ද? එය සමස්ත නිර්මාණයම අසාර්ථක කරනු නොලබන්නේද?

නමුත් මාගේ මිතුරන්ගේ අදහස වූයේ කථාවේ පෙර සිතා සිටි පරිදිම විප්ලවවාදීයා ජය ගත යුතු බවයි. විප්ලවවාදියාට සියලූ ප‍්‍රශ්න ජය ගන්නට අවශ්‍ය ධෛරයය හා කාලය ඇත. ඔහුගේ කම්කරු සගයන්ට සමාජීය අසාධාරණය තුරන්කරමින් රාජාණ්ඩුව පෙරලා දැමුවා මෙන්ම ඉහත අරමුණ වෙනුවෙන්ද කැපවිය හැකි බව ඔවුන්ගේ තර්කය විය. නමුත් මම මගේ නිර්මාණයට හා එහි කථානායකයාට බෙහෙවින් ආදරය කරමි. උත්තර නැති ප‍්‍රශ්න වැලක කථානායකයා අතරමං කරන්නට මෙන්ම නිර්මාණයේ වටිනාකම අවතක්සේරු කරන්නට කැමති නැති නිසාවෙන්ම එම අදහස අත්හැර දැමුවෙමි.

මීට අමතරව මා වෙත තවත් විකල්පයක් විය. විප්ලවවාදියා ජයගතහොත් ඔහුට මේ ගැටලූවලට පිලියම් සොයන්නට සිදුවනු නියතය. පෙර පුරුදු ලෙසම රජු සටන ජයගතහොත් විප්ලවවාදියා වීරයෙක් ලෙස ඉතිහාසයට එක්වනු ඇත. එවිට එය මාගේ ආදරණීය කථානායකයාට කල හැකි උපරිම ගෞරවයද සිදුකලා වනු ඇත.

"ඒත් ආයෙත් රජාම දිනුවොත්"

මට මා පිලිබඳව සිහිවිනි. උසස් අධ්‍යාපනය සදහා අගනුවරට රිංගාගත් දින පටන්ම ධනවාදී ක‍්‍රමයේ අසාධාරණයන්ට නතුවූ සැටි, මේ අසාධාරණයන්ට විකල්පයක් සොයන්නට මටම ශපථ කරගත් සැටි මාගේ දෙනෙත් ඉදිරියේ මැවී පෙනෙන්නට විය. සැබැවින්ම මට මේ සමාජ ක‍්‍රමය ශෝධනය කරන්නට අවශ්‍ය විය. පවතින ක‍්‍රමය තුලින් අන්තයටම බැට කෑ දිලින්දෙකු වන මම කෙසේනම් මාගේ නිර්මාණයේ ජයග‍්‍රහනයත් ධනවාදයටම පවරන්නේද? පියවි සමාජය දෙුස බැලූකල සෑම ස්ථානයකදීම හොදින් හෝ නරකින් ධනවාදය සියල්ල ජයග‍්‍රහනය කර ඇත.

"එහෙවු එකේ මම මොකටද මගේ නිර්මාණයේදිත් අසාධාරණයටම දීනන් දෙන්නෙ, ඒකනම් හරීයන්නෙ නෑ. අඩුම තරමෙදී මගේ නිර්මාණයෙදිවත් ධනවාදය පරදීන්නම  ඕනි."

එසේ කිරීමට නම් මා වෙත තවත් එකම එක විකල්පයක් විය. කම්කරු නායකයාගේ සිතේ රැඳි ප‍්‍රශ්න රැසට පිළිතුරු සොයන්නට මට හැකිනම්, රජු මරාදමා විප්ලවය දිනවන්නට මට හැකියාව තිබිනි. සමාජවාදයේ ප‍්‍රායෝගික භාවිතය පිළිබඳ මම හදාරන්නට වුනෙමි. ඒ පිලිබඳව ලියවුනු පොත්පත්, රුසියානු විප්ලවය සම්බන්ධ සටහන් කියවූවෙමි. නමුත් උක්ත ප‍්‍රශ්න වලට පිළිතුරු සොයනු වෙනුවට එකක් පරයා තවත් එකක් වශයෙන් තවත් ගැටලූ නැගෙන්නට විනි. එක් ගැටලූවකට පිළිතුුරු ලෙස මා දුටු දෙය තවත් ප‍්‍රශ්ණ ගණනාවක ආරම්භය විය. මෙවැනි පසුබිමක් තුලයි මා 13 වන වතාවටත් නිර්මාණය කියවා බලමින් යම් වෙනසක් කරන්නට යත්න දැරුවේ. නමුත් එයද සාර්ථක නොවන සෙයක් පිලිබඳව ඉඟිපලවෙමින් පැවතිනි. නමුත් හදිසියේම යම් සිතුවිල්ලක් මා සිත ආක‍්‍රමණය කලේය.

"කථානායකයාටවත් උත්තර නැති ප‍්‍රශ්න වලට මම කොහොමද උත්තර හොයන්නෙ, සමාජවාදයේ ප‍්‍රයෝගික ප‍්‍රශ්න වලට උත්තර හොයන්න මම සමාජවාදියෙක් නෙවෙයිනෙ. දැන් මට කරන්න තියෙන හොදම වැඬේ තමයි මේ මගුල අතෑරල දාලා වෙන මොකක් හරි ලියන්න පටන්ගන්න එක"

නිමි.

NO POLITICS

"මිනිසා දේශපාලන සත්වයෙකි" එහෙමයි දේශපාලන විද්‍යාවට ඉගැන්නුවේ, එතකොට ආර්ථික විද්‍යාවෙදි, කුටුම්භ සහ ව්‍යාපාර අංශවල ක්‍රියාකාරකම් රජය එහෙමත් නැත්නම් දේශපාලන බලාධිකාරයේ ඍජු මැදිහත්වීම මත තීරණය වෙනවලු. ව්‍යාපාර අධ්‍යනයට, කළමනාකරණයට, ගිණුම්කරණයට අනුව නම් භාහිර පරිසරයෙ වඩාත් තීරණාත්මකම, වැදගත්ම සාධකය දේශපාලනයලු.

ඒ කතාවත් ඇත්ත. අද කාලෙ පාරකට තාර ටිකක් දාගන්න, පාලමක් බෝක්කුවක් හදාගන්න කොටින්ම එක වසරට ළමයෙක් දාගන්න පුළුවන්ද දේශපාලකයෙකුගෙ ලිපියක් නැතිව?

හැමදේම දේශපාලනය මතම තීරණය වන මේ ධර්මද්වීපයේ ක්‍රියාශීලීම   බුද්ධිමත්ම තරුණ පිරිස වන සරසවි ශිෂ්‍යයන්ට සරසවියට එනකොට අම්ම තාත්ත, නෑදෑ වැඩිහිටියො, ගුරුවරු දෙන්නෙ එකම එක අවවාදයයි.

"අනේ පුතේ, උඹ නම් ඔය දේශපාලන වැඩවලට පැටලෙන්න එපා."

අනේ මන්ද, වැරැද්ද අපේද, උපදෙස් දෙන අයගෙද, නැත්නම් දේශපාලකයන්ගෙද?

පුතුනේ.....

  දිගු කාලයක්, නිහැඬියාවක්  අවසාන වෙලා ආයෙත් මන්දාරම අහසෙ වැහි පොදක් මතුවෙලා. ඉතින් සහෘදය කමා කොට වූ අඩුපාඩුවට, එන්න අපි තෙමෙමු අයෙත් මේ සිතිවිලි වැස්සේ................

සමන් ගිර වැඳ හිරු නැගි අළුයම
පහන් තරුවයි මා
කොළොම්පුරයෙන් හිරු බසින විට
ඉරබටු තරුවයි මා
නුඹට අමතකද පුතුනේ.....

හිරු නැගෙන්නට වෙර දරන විට
තිඹිරිගෙය අභියසට වී
නුඹේ ගමනට පාර කියු ඒ
පහන් තරුවයි මා
නුඹට අමතකද පුතුනේ.....

කොළොම්පුරයට සින්න වී ඔබ
අපේ අහසින් නික්ම යන විට
අඳුරු අහසේ තනිව වෙර දරනා
ඉරබටු තරුවයි මා
නුඹට අමතකද පුතුනේ.....

ඔබට නිසැකවම සිතේවි මේ පද පේළි අතර සැඟව තියෙන්නෙ පියෙකුගෙ කඳුලු කියල. ඒත් ඒ වෙනුවට මේ තියෙන්නෙ ගමේ පාසලක්  ගැන එහෙම නැත්නම් අපි හැමෝම අමතක කරල දාල ඉන්න අපේ ගමේ පාසලේ ගුරුතුමාගේ වචනයි කියල හිතල ආයෙත් මේ පද පේළි කිහිපය කියවල බලන්න ඔබට ආරාධනා කරනව.

සරසවිය?

සරසවි සිසුන් මිලිටරියට නතු                          කරන 

නීති හදයි පාලකයන් කටු                               ගිලින

සිසුන් සිටින තුරු ගව්වක් දුර                           දකින

උන්ගේ නීති පමනකි දහවල්                           සිහින

සරසවි බිමත් යුධ කඳවුරු කරනු                     සිතූ

මහ රජාගෙ අණ පරිදිම නීති                           තැනූ

උන්ගේ අමන තීරණයට වෙලා                       නතූ

හොස්ටල් යා යුතුද දහයට මෙයින්                  මතූ

නිදහස් අධ්‍යාපනය රැකුමට හඬක්                  නගා

සිසු සංගම් කල යුතුකම හොඳින්                    සිතා

නෑ පසු තැවීමක් කිසිවිට දැනී                         මෙදා

තහනම් කලේ අපි හරි දේ කරපු                     නිසා

සරසවි සිසුන් මී හරකුන් ලෙසින්                   සිතා

කරනා අමනකම් කෙලෙසක සිටිමු                 දරා

උන්ගෙම ගොන් කමින් අප සටනට                කැඳවා

දැන් කෑ ගසයි අයියෝ නයි කනවා                 කියා

සරසවිය..

දේශන ශාලා වල
පුස්ථකාලෙ මහ පොත් අතර
අපි
සරසවි ජීවිතය හොයනව
ඒත් සරසවි ජීවිතය
මැට්ටෙ, වලේ, තනි ගස් පෙල යට
අපි එනකම්
තාමත් මග බලාගෙන ඉන්නවා...

Quality (අනේ මන්දා)

සමාසික යදමින්
බැඳ සිර ගත කල නොහැකි වූ කල,
දැන් දත කයි
තනන්නට
"නියම සරසවි සිසුවා"
80% දඬුකඳේ ගසා......

ඇත්ත නේන්නම්, ගහල හරි හදා ගන්න එපැයි.

ඇයි මං විතරක්????

රන්ඩු වෙන්නෙ අපි දෙන්නම,
බැන ගන්නෙ අපි දෙන්නම,
ගහගන්නෙ අපි දෙන්නම,
ඊට පස්සෙ
කතා නොකර ඉන්නෙත්  අපි දෙන්නම
ඒත්
ඇයි හැමදාම
මම විතරක්
ඉස්සෙල්ලම
"SORRY"
කියන්න ඕන???????

අහගනිල්ලා

කෙසඟ සිරුරක් තියුණු දෙනෙතක්

සත්‍යයේ ලෝ දහම කියනා පිරිසක්

කන්දියල්ලා උන්ගෙ හඬටත්

දෙසවනින් නොව බුද්ධියෙන් එක වරක්

දෙසවනින් නොව හදවතින් තව වරක්

උන් නඟන ඒ සත්‍යයේ හඬ

රතු පාට කමිසයට කොටු කල

මෝඩ මිනිසුනි අහගනිල්ලා

දෙසවනින් නොව බුද්ධියෙන් එක වරක්

දෙසවනින් නොව හදවතින් තව වරක්

රුදුරු සරසවි නිම්නයක සිට

නොදුටු පරපුර වෙතට ඉගෙනුම

උරුම කරනට වෙර දරන හඬටත්

දෙසවනින් නොව බුද්ධියෙන් එක වරක්

දෙසවනින් නොව හදවතින් තව වරක්

(අ) නුවණැති පුරෝහිතයා

එකෝමත් එක රටක හිටපු රජතුමෙකුට රට තොට සංචාරය කරනකොට සිරිපතුලෙ මඩ ගෑවෙන එක ලොකු ප්‍රශ්ණයක් උනාලු. ඒත් ඉතින් සංචාරය නතර කරන්නත් බෑනෙ, රාජකාරිය දේවකාරියටත් වඩා උතුම්ලුනෙ. මේකට විසඳුමක් විදිහට රජතුමා යෝජනා කලාලු රටේ හැමතැනකම බුමුතුරුණු අතුරන්න. ඒත් නුවණැති පුරෝහිතය කිව්වලු රජතුමාගෙ කකුලෙ මඩ ගෑවෙන එකනෙ ප්‍රශ්නෙ, ඉතින් රජතුමාගෙ කකුල් වැහෙන දෙයක් හැදුවනම් හරිනෙ කියල. ඔය විදිහටලු සපත්තු ඇති උනේ.

ඒ අතීත කතාව,

ඒ කාලේ අපි නුවණැති පුරෝහිතයට අත්පුඩි තැළුවා.

ඒත් අද හිතෙනවා,

ඒ මෝඩ පුරෝහිතය එහෙම නොකීවනම්, 

එදා වේල හොයා ගන්න මහන්සි වෙන දුප්පත් අහිංසක මිනිස්සුන්ගෙ කකුල් වලත් මඩ බිංදුවක් වත් නොගෑවෙන වර්තමානයක් අපිටත් උරුම වෙන්න ඉඩ තිබුන කියල.

Devise Found

ගෙන්  :  XX/MS/XXX (සම්පූර්ණ මෘදුකාංග හා දෘඩංග පද්ධතියකි)
වෙත  :   නාඳුනන පද්ධතිය

• කිසිඳු අයුරක සාර්ථක සම්බන්දතාවයක් ගොඩ නඟා ගැනීමට නොහැකිව ඒ සඳහා සුදුසු පද්ධතියක් සොයමින් ( search කරමින් )  සිටි මට ඔබේ XX/MS/XXX දරණ පද්ධතිය හමු වූ බව මින් දැනුම් දෙමි.

• නමුත් සබඳතාවය ගොඩ නඟා ගැනීමට පෙර ඔබට ගිනි තාප්පයක් ( Fire Wall ) මැදින් පැනීමට සහ Virus Guard  එකක් යටතේ පරීක්ෂාවකට ලක් වීමට සිදු වනු ඇත.

• ඉහත පරීක්ෂණ 2න් ඔබ සාර්ථක වුවහොත් මා සමග සාර්ථක සම්බන්දතාවයක් ආරම්භ කිරීමට ඔබට හැකි වනු ඇත.  

• සබඳතාවය ආරම්භයේදී 10 tb  පමණ වන මාගේ ධාරිතාවයෙන් 2 tb  ක ඉඩ ප්‍රමාණයක් ඔබ වෙනුවෙන් වෙන් කිරීමට බලාපොරොත්තු වන අතරම ඔබගේ ධාරිතාවයේ ද එවැනිම ඉඩක් බලාපොරොත්තු වෙමි.

• සබඳතාවයේ සාර්ථකත්වය මත පදනම්ව මා සතුව ඇති ආදරය සහ කරුණාව නම් වූ මිලාධික මෘදුකාංග (Software ) පහසු ගෙවීමේ ක්‍රමයට ලබා ගැනීමේ හැකියාව ඔබට ලැබෙනු ඇත.
   

• තවද ඔබේත් මගේත් දෘඩාංග ( Hardware) පොදුවේ භාවිතා කිරීමට ඔබ කැමති වනු ඇතැයි සිතමි.

• සබඳතාවය ඉතා සාර්ථක උවහොත් යම් දිනක තවත් අප වැනිම පද්ධතියක් බිහි කිරීමටද අපට හැකි වනු ඇත.

• සැලකිය යුතු ප්‍රධානම කරුණ වන්නේ සබඳතාවය ඕනෑම වේලාවක විසන්දි කිරීමට ( disconect කිරීමට ) ඔබට මෙන්ම මටද හැකියාවක් තිබෙන බවයි. ඒ වන විට යම් අලාභයක් ලබා ඇත්නම් එය තනිව විඳදරා ගැනීමට සිදු වනු ඇත.

• ඉහත කොන්දේසි වලට යටත්ව සබඳතාවය ඇති කර ගැනීමට කැමති නම්  කරුණාකර ඉල්ලීම පිලිගන්න (Accept the Request) . මුර පද ( Password ) යොදා නොමැත.

• අදාළ නොවේ නම් නොසලකා හරින්න. ( Ignore All )

..................................................................................................................................................................

ප.ලි.

ඔබේත් මගේත් මෙම සබඳතාවය "ආදරය " ලෙස නම් කල යුතුයැයි මම යෝජනා කරමි.ඔබ එය පිලිගන්නේනම් ඔබ පෙම්වතිය ලෙසත් මා පෙම්වතා ලෙසත් මින් මතුවට හැඳින්විය හැකි වනු ඇත..

අපි නම් නිදි නෑ.....

ඔය හැදෙන්නෙ ගොඩනැගිලි
කෑ ගැහුවෙ නැතුවට
ක්‍රීඩාංගන පාරවල්
ඉල්ලන්නත් කලිංම හදනවනෙ
අර සංගම් නැතුවට
අනේ අම්මප
අපරාදෙ අපි කෑගැහුවෙ

ක්‍රීං ක්‍රීං ක්‍රීං ක්‍රීං ක්‍රීං ක්‍රීං ක්‍රීං

ෂික් විතරක්
නිදාගත්ත විතරයි මතක
මේ කෙහෙල්මල් එක වදිනවනෙ

සුබ අළුත් අවුරුද්දක් වේවා !

පුම්බපු බැළුන් බෝල

නම කියන්න තේරෙන්නෙත් නැති

කෑම ජාති,

තව වීදුරු බෝතල්වල සැර බීම

වටකරගත්

පාට පාට සිහින ලොවකි

"31^st night"

ඒත් පහුවදාට

පුරුදු ගහකොල

පුරුදු සුලඟමයි.

පුරුදු ප්‍රශ්න වැලම

කරපින්නාගෙන

දිගේලි කරාවි

බර අදින්නට

තවත් දොලොස් මහක් පුරාවටම…………..

මේ නම් ආදරයමයි......

ඔබෙ එකම එක කටුක වදනක්,
කිණිසි පහරකි
නියම ඉලක්කයටම එල්ල වූ
වියරු වෙයි නුඹ - රුදුරු වෙයි නුඹ
නමුත් බැහැ නේද එක තත්පරයකට වඩා
කරන්නට ඔය බොරුව.
අසුරු සැනකින්
ලපටි දැරියකගෙ සිනහවක් පා
බොලඳ වදන් දොඩමින්
මට තුරුළු වන්නේ
නුඹම නොවෙද?
පුදුමයි,
ආදරයට කල හැකි හපන්කමක්.
ඇත්තමයි,
 මේ නම් ආදරයමයි......

පමා වී ආ වසන්තය.....

දැන්වීමයි........

බෙලිහුල් ඔය තහනම් කර ඇත,

සමනල වැව සිඳී ගොසින්,

ඒත්........

සහෝදරත්වයේ ආදර කන්ද,

(නොසැලී නිහඬවම,)
උල්පත් වලට සෙවන සදයි,
නව උල්පත් බිහි කරයි.
ඉක්මනින්ම අස්වද්දනු වස්
යලිත් සරසවි කෙත................

කවුන්සිල්....

ඉන්නකොට කරදර,

නැති උනාම

ඊටත් වඩා කරදර,

අපේම අපේම

අපේ සෙට් එක.

................?